Koordinatorja e Grupit Parlamentar të Bashkimit Demokratik për Integrim (BDI), Rina Ajdari, mori pjesë në takimin e Komisionit për Çështje Evropiane me Sekretarin e Shtetit për Bashkimin Evropian në Ministrinë e Punëve të Jashtme të Mbretërisë së Spanjës, Fernando Mariano Sempedro Marcos, në praninë e Ambasadorit të Mbretërisë së Spanjës në Republikën e Maqedonisë së Veriut, Rafael Soriano Ortiz.
Gjatë diskutimit, Ajdari theksoi se integrimi evropian nuk është vetëm një proces politik, por edhe një angazhim për respektimin e vlerave themelore mbi të cilat është ndërtuar Bashkimi Evropian.
Ajo nënvizoi se mbrojtja e karakterit multietnik të shtetit, respektimi i Marrëveshjes së Ohrit, garantimi i përdorimit të gjuhës shqipe, përfaqësimi i drejtë dhe adekuat, si dhe barazia e të gjitha komuniteteve që janë pjesë e rendit kushtetues, janë parime që përputhen plotësisht me standardet dhe vlerat evropiane.
Ajdari shprehu pritjen që mbështetja e Bashkimit Evropian të vazhdojë, jo vetëm për avancimin e procesit të negociatave, por edhe për forcimin e besimit se perspektiva evropiane e Republikës së Maqedonisë së Veriut mbetet reale, e besueshme dhe e arritshme.
Në takim u ritheksua rëndësia e vazhdimit të reformave dhe e ruajtjes së dialogut konstruktiv në funksion të përshpejtimit të procesit të integrimit evropian të vendit.
