Sot, Myftinia e Tetovës pati kënaqësinë të mirëpresë në një vizitë zyrtare Kryesinë e Xhamisë së Oesingenit të Zvicrës i përbërë nga kryetari z. Bujar Sulejmani, nën kryetari h.Nuriman Musliu dhe z.Sadat Sulejmani të cilët u pritën nga Myftiu i Tetovës, dr. Selver Xhemaili.
Gjatë takimit u zhvillua një bisedë e ngrohtë dhe vëllazërore mbi aktivitetet fetare dhe organizative të komunitetit islam në diasporë dhe vendëlindje. Me këtë rast, anëtarët e kryesisë e njoftuan Myftiun me ecurinë e blerjes së objektit të Xhamisë së re në Oesingen, duke paraqitur fazat e realizimit të këtij projekti me rëndësi të veçantë për besimtarët shqiptarë në atë rajon të Zvicrës. Ata theksuan përkushtimin e komunitetit për ta përfunduar këtë vepër, e cila do të shërbejë si qendër e jetës fetare, arsimore dhe kulturore.
Myftiu dr. Selver Xhemaili i përgëzoi për angazhimin dhe punën e palodhshme në realizimin e këtij projekti madhor, duke vlerësuar kontributin e mërgatës sonë në ruajtjen dhe kultivimin e vlerave islame e kombëtare. Ai shprehu gatishmërinë e Myftinisë së Tetovës për të mbështetur dhe forcuar bashkëpunimin me institucionet fetare të diasporës edhe në të ardhmen.
Myftinia e Tetovës i falënderon përfaqësuesit e Kryesisë së Xhamisë së Oesingenit për vizitën dhe kontributet e tyre si dhe u uron suksese në përfundimin e projektit të xhamisë së re, duke lutur Allahun e Madhëruar që ta begatojë këtë vepër madhështore.
