Sot shënohen 20 vjet nga operacioni i njohur si “Fluturimi i Shqiponjës”, ngjarje e rëndë për familjet malësore, të cilat në atë kohë u arrestuan, u torturuan dhe u akuzuan për terrorizëm.
Në një reagim me rastin e 20-vjetorit, nënkryetari i Parlamentit të Malit të Zi, Nikollë Camaj, rikthen në vëmendje këtë ngjarje dhe kërkon që e vërteta të dalë në dritë dhe të vendoset drejtësia.
Camaj thekson se çështja e trajtimit të familjeve malësore është tashmë pjesë e procedurave në Parlamentin e Malit të Zi, duke shprehur pritjen që përgjegjësit të mbajnë përgjegjësi për dëmet e shkaktuara.
“Ky terror shtetëror mbi malësorët e kemi futur në procedurë në Parlamentin e Malit të Zi dhe pres që e vërteta të dalë në shesh, e dëmi të paguhet”, shprehet Camaj.
Ai gjithashtu thekson se mbetet në pritje të një kërkim-faljeje publike për ngjarjet e “Fluturimit të Shqiponjës”.
“Natyrisht se mbetem në pritje të kërkim-faljes publike për ‘Fluturimin e Shqiponjës’ nga pala e bërësve”, deklaron nënkryetari i Parlamentit të Malit të Zi, Nikollë Camaj.
