Nënkryetari i Kuvendit të Malit të Zi, Nikollë Camaj, ka reaguar pas aktgjykimit të shkallës së parë ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.
Camaj e ka cilësuar këtë si një ditë të rëndë për kombin shqiptar dhe veçanërisht për Kosovën, duke theksuar se aktgjykimi i shkallës së parë nuk përbën vendim të formës së prerë.
“Ky aktgjykim i shkallës së parë nuk mund të jetë vendim i formës së prerë. Rruga për drejtësi vazhdon dhe besimi ynë është se në fund drejtësia do të triumfojë dhe pafajësia do të vërtetohet”, është shprehur Camaj.
Ai ka vënë në pah edhe rëndësinë e mbështetjes së Shteteve të Bashkuara të Amerikës për Kosovën, duke i cilësuar SHBA-të partner dhe mik kryesor në procesin e çlirimit dhe shtetndërtimit të Kosovës.
“UÇK-ja ishte ushtria çlirimtare që u ngrit për të mbrojtur popullin e Kosovës, e jo për të kryer krime mbi të tjerët”, ka deklaruar Camaj.
Në fund, nënkryetari i Kuvendit të Malit të Zi ka bërë thirrje për ruajtjen e dinjitetit, kujtesës dhe unitetit.
“Prandaj, të ruajmë dinjitetin, kujtesën dhe unitetin”, ka përfunduar Camaj.
Ja postimi i plotë:
Ditë e rëndë për kombin shqiptar, e veçanërisht për Kosovën.
Aktgjykimi i shkallës së parë ndaj ish-krerëve të Ushtrisë Çlirimtare të Kosovës; Hashim Thaçit, Kadri Veselit, Jakup Krasniqit dhe Rexhep Selimit është një moment i dhimbshëm për Kosovën dhe për mbarë kombin shqiptar.
Ky aktgjykim i shkallës së parë, nuk mund të jetë vendim i formës së prerë. Rruga për drejtësi vazhdon dhe besimi ynë është se në fund drejtësia do të triumfojë dhe pafajësia do të vërtetohet.
Në këtë rrugëtim, presim dhe llogarisim në mbështetjen e Shteteve të Bashkuara të Amerikës, partnerit dhe mikut kryesor në procesin e çlirimit dhe shtetndërtimit të Kosovës.
Perndryshe, UÇK-ja ishte ushtria çlirimtare që u ngrit për të mbrojtur popullin e Kosovës, e jo për kryer krime mbi të tjerët.
Prandaj, të ruajmë dinjitetin, kujtesën dhe unitetin.
