Zhdukja e Eglant Koçit është duke u hetuar nga struktura të specializuara të Policisë së Shtetit, ndërsa kërkimet janë intensifikuar në disa zona përreth Tiranës, por edhe në Elbasan.
Drejtori i Policisë së Tiranës, Oliger Torba, deklaroi në një konferencë për mediat se rasti po ndiqet nga strukturat e krimeve të rënda dhe se është ngritur një grup i posaçëm hetimor për lokalizimin e personit të zhdukur. Sipas tij, hetimet janë përqendruar në disa rrethina të kryeqytetit, ku po kryhen kontrolle dhe verifikime në terren, ndërsa paralelisht po analizohen edhe pista të tjera të mundshme.
“Një strukturë e posaçme po merret me rastin dhe kërkimet janë fokusuar në disa zona përreth Tiranës,” u shpreh Torba, duke shtuar se operacioni është në zhvillim të vazhdueshëm. Ai konfirmoi gjithashtu se kërkimet janë zgjeruar edhe jashtë qarkut të Tiranës, përfshirë zonën e Elbasanit, në kuadër të hetimeve për gjetjen e Koçit. Koçi dyshohet se u vra dhe u zhduk nga shoku i tij i ngushtë, Armand Shakaj, i cili është në arrati.
