Mali i Zi ka shënuar një tjetër sukses në procesin e integrimit evropian. Gjatë Konferencës Ndërqeveritare të mbajtur në Bruksel, zëvendëskryeministri dhe lideri i Forumit Shqiptar, Nik Gjeloshaj, mori pjesë në mbylljen e një kapitulli tjetër negociues me Bashkimin Evropian.
Me mbylljen e këtij kapitulli, Mali i Zi arrin në gjithsej shtatë kapituj të mbyllur, duke vendosur një rekord në ecurinë e deritanishme të negociatave për anëtarësim në BE. Ky konsiderohet një hap i rëndësishëm në avancimin e procesit të integrimit evropian dhe një konfirmim i progresit të arritur në përmbushjen e standardeve dhe reformave të kërkuara.
Pjesëmarrja e Nik Gjeloshajt në këtë konferencë dhe kontributi i tij në procesin negociues vlerësohen si pjesë e angazhimit të vazhdueshëm të Qeverisë së Malit të Zi për përshpejtimin e rrugës drejt anëtarësimit në Bashkimin Evropian.
Mbyllja e kapitullit të shtatë përfaqëson një moment domethënës për Malin e Zi, duke forcuar pozitën e tij si vendi më i avancuar në procesin e zgjerimit të Bashkimit Evropian në rajonin e Ballkanit Perëndimor. Ky zhvillim dërgon një sinjal pozitiv se reformat po japin rezultate dhe se rruga evropiane e vendit po vazhdon me ritëm të qëndrueshëm.
