Nga Beqir SINA – New York
Më 24 shtator 2026, në Gotham Hall të New York-ut, u mbajt Gala-ja e Dytë Vjetore e Këshillit të Marrëdhënieve Shqiptaro-Amerikane (AARC).
Ngjarja, e organizuar gjatë javës së nivelit të lartë të Asamblesë së Përgjithshme të OKB-së, mblodhi liderë politikë, diplomatë, përfaqësues të diasporës dhe miq të komunitetit shqiptaro-amerikan.
Qëllimi i mbrëmjes ishte forcimi i lidhjeve mes Shteteve të Bashkuara, Shqipërisë, Kosovës dhe komuniteteve shqiptare në Ballkanin Perëndimor, si dhe promovimi i unitetit dhe zërit të përbashkët të shqiptaro-amerikanëve në Uashington.
Programi nisi me himnet kombëtare të SHBA-së, Shqipërisë, Kosovës dhe Maqedonisë së Veriut, të ndjekura nga lutja e unitetit fetar e udhëhequr nga Atë Viktor Gjergji dhe Imam Edin Gjoni.
Fjalën e mirëseardhjes e mbajti Eli Rusi, Kryetar i Bordit të AARC-së, i cili falënderoi të pranishmit, sponsorët dhe vullnetarët, duke theksuar se organizata ekziston për të ndërtuar ura mes qeverive, komuniteteve dhe gjeneratave.
Pas një videoje që përmblodhi punën e AARC-së gjatë vitit, fjalën e hapjes e mbajti Martin Vulaj, President i AARC-së.
Ai theksoi rolin e organizatës në ngritjen e zërit shqiptaro-amerikan në Uashington, mbështetjen për aspiratat e Kosovës drejt NATO-s, ndërgjegjësimin për sfidat në Maqedoninë e Veriut dhe rinovimin e Caucus-it të Çështjeve Shqiptare në Kongres.
