Kryetari i Bashkimit Demokratik për Integrim, Ali Ahmeti, ka shprehur ngushëllimet e tij për ndarjen nga jeta të Sahit Jasharit.
Në mesazhin e tij, Ahmeti e ka cilësuar Sahit Jasharin si një ndër të parët e rezistencës dhe luftës për liri, krah Adem dhe Hamzë Jasharit, duke vlerësuar kontributin e tij të çmuar në rrugëtimin e popullit shqiptar drejt lirisë.
“I rrallë në virtyte, burrë zakoni, patriot e atdhetar, i guximshëm dhe vizionar. Mes dhimbjes për familjarët e shumtë të rënë në altarin e lirisë, ai arriti ta përjetojë pavarësinë e Kosovës sonë”, thuhet në reagimin e Ahmetit.
Duke shprehur ngushëllime familjes Jashari, bashkëluftëtarëve dhe mbarë kombit shqiptar, Ahmeti ka nderuar figurën e Sahit Jasharit me fjalët:
“Të qoftë i lehtë dheu i atdheut, Sahit.
Sot po u ribashkohesh familjarëve, Ademit e Hamzës në përjetësi. Lavdi jetës dhe veprës së Sahit Jasharit!”.
Ja postimi plotë:
Një ndër të parët ndër ne, krah Adem e Hamzë Jasharit, bashkëluftëtar i denjë i lirisë, Sahit Jashari, sonte na la.
I rrallë, burrë zakoni, patriot e atdhetarë, i guximshëm e vizionarë.
Në mes të dhimbjes për familjarët e shumtë të rënë në altarin e lirisë, arriti ta përjeton pavarësinë e Kosovës tonë.
Të qoftë i lehtë dheu i atdheut Sahit, po i ribashkohesh familjarëve dhe Ademit e Hamzës në pëjetësi.
Ngushëllime vëllazërore familjes Jashari, bashkëluftëtarëve dhe gjithë kombit.
Lavdi!
