Kryetari i Bashkimit Demokratik për Integrim, Ali Ahmeti, priti sot në selinë e partisë z. Gjino Mulliqi, Zëvendëskryetar i Komunës së Wylie, në shtetin e Teksasit, Shtetet e Bashkuara të Amerikës.
Gjatë takimit, Ahmeti dhe Mulliqi zhvilluan një bashkëbisedim të ngrohtë dhe miqësor, në të cilin shkëmbyen mendime për zhvillimet aktuale politike, sfidat me të cilat përballet vendi, si dhe për rëndësinë e rolit të mërgatës shqiptare në forcimin e lidhjeve me Shtetet e Bashkuara të Amerikës.
Në takim u vlerësua lart kontributi i bashkatdhetarëve shqiptarë në SHBA, të cilët prej dekadash kanë qenë një mbështetje e rëndësishme për çështjen kombëtare, zhvillimin e vendit dhe avancimin e proceseve demokratike.
Bashkëbiseduesit theksuan se bashkëpunimi me mërgatën shqiptare mbetet një vlerë e veçantë dhe një urë e fuqishme që forcon lidhjet mes vendlindjes dhe diasporës, duke kontribuar në realizimin e synimeve të përbashkëta dhe në fuqizimin e partneritetit strategjik me Shtetet e Bashkuara të Amerikës.
