Në një atmosferë pozitive, vëllazërore dhe me pjesëmarrje të gjerë të anëtarësisë, sonte u mbajt Kuvendi Zgjedhor i Degës së Bashkimit Demokratik për Integrim në Butel, ku unanimisht u konstituuan organet dhe strukturat drejtuese të degës, përfshirë Kryesinë e Degës, Këshillin Mbikëqyrës dhe Komitetin e Veteranëve.
Kryetari i BDI-së, Ali Ahmeti, përshëndeti punimet e kuvendit dhe vlerësoi unitetin, pjekurinë politike dhe përkushtimin e strukturave partiake në Butel, duke theksuar se këto vlera kanë qenë themeli i suksesit të BDI-së gjatë 24 viteve të veprimtarisë së saj.
Në fjalimin e tij, Ahmeti u ndal edhe te zhvillimet politike në vend, duke shprehur shqetësimin për, siç tha ai, përpjekjet e vazhdueshme gjatë dy viteve të fundit për të zhbërë arritjet e ndërtuara me mund dhe sakrificë nga qytetarët dhe shqiptarët në vend.
“Po dëshmojmë tendenca që cenojnë të drejtat e fituara, barazinë dhe mekanizmat që garantojnë përfaqësim të drejtë. Ne mbetemi të përkushtuar në mbrojtjen e çdo të arriture të shqiptarëve dhe në avancimin e pozitës së tyre institucionale”, theksoi Ahmeti.
Ai nënvizoi se Bashkimi Demokratik për Integrim mbetet një forcë e bashkuar, e organizuar dhe e vendosur për mbrojtjen e Marrëveshjes së Ohrit, barazisë së plotë dhe perspektivës euroatlantike të vendit.
Në përmbyllje, Ahmeti falënderoi anëtarësinë dhe strukturat e degës së Butelit për angazhimin dhe mbështetjen e vazhdueshme, duke theksuar se BDI do të vazhdojë të jetë në shërbim të qytetarëve dhe në mbrojtje të dinjitetit, barazisë dhe interesit të tyre.
