Përplasja politike mes LSDM-së dhe VMRO-së intensifikohet pas deklaratës së Venko Filipçes, i cili e quajti kryeministrin Hristijan Mickoski “Vuçiçi i vogël”. Nga ana tjetër, VMRO-DPMNE iu kundërpërgjigj me akuza se Filipçe është “Zaev i vogël” dhe se duhet të japë llogari për lidhjet dhe pasurinë në Dubai
Shkup, 26 dhjetor – Përplasja politike mes LSDM-së dhe VMRO-DPMNE-së është ashpërsuar ndjeshëm pas deklaratave të kryetarit të LSDM-së, Venko Filipçe, i cili e quajti kryeministrin Hristijan Mickoski “Vuçiçi i vogël”, duke e akuzuar për imitimin e presidentit serb Aleksandar Vuçiq dhe për adoptimin e modelit të tij autoritar të qeverisjes. Reagimi i VMRO-DPMNE-së ishte i menjëhershëm, me kundërakuza se Filipçe është “Zaev i vogël” dhe se duhet të japë llogari për lidhjet dhe pasurinë e tij në Dubai. Në konferencën e djeshme për shtyp, Filipçe përsëriti qëndrimin e tij se bashkëpunimi i autoriteteve të Maqedonisë së Veriut me qeverinë serbe dhe Partinë Progresive Serbe (SNS) është i dukshëm dhe i qëllimshëm. Ai theksoi se, sipas tij, kryeministri Mickoski ka filluar ta imitojë presidentin Vuçiq edhe në paraqitjet publike.
“Është e dukshme bashkëpunimi i kësaj qeverie me pushtetin serb të Aleksandar Vuçiqit dhe SNS-së, përkatësisht personalisht me të. Qytetarëve tashmë u bie në sy se si kryeministri Mickoski përpiqet ta imitojë Vuçiqin në lëvizje, në qëndrim, në mënyrën e dhënies së deklaratave dhe në konceptet e politikës. Nofkën tashmë e ka marrë: Vuçiçi i vogël”, deklaroi Filipçe.
Sipas tij, modeli i qeverisjes autoritare që zbatohet në Serbi po reflektohet gjithnjë e më shumë edhe në Maqedoninë e Veriut. “Ajo që bën Vuçiqi në Serbi, Mickoski përpiqet ta bëjë edhe këtu – një njeri i vetëm të përfaqësojë të gjithë politikën dhe partinë, ndërsa të tjerët vetëm të zbatojnë urdhrat e tij”, tha ai. Filipçe iu referua edhe zhvillimeve në Serbi pas tragjedisë në Novi Sad dhe protestave masive që pasuan, duke theksuar se dialogu atje është pothuajse i pamundur dhe shoqëria thellësisht e përçarë. “Në Serbi kjo shkon deri në përplasje, ndërsa vendi po përballet me kolaps ekonomik dhe izolim nga Evropa. E njëjta matricë e rrezikshme sot po zbatohet edhe në Maqedoni”, paralajmëroi ai. Në këtë kontekst, kreu i LSDM-së theksoi se kjo politikë çon drejt izolimit nga Bashkimi Evropian dhe shërben si alibi për fshehjen e krimit dhe korrupsionit. “Kërkohen vetëm justifikime që vendi të mbahet i izoluar nga Bashkimi Evropian. Nuk ka shpjegim tjetër”, u shpreh Filipçe.
Duke folur për çështjen me Bullgarinë, ai tha se përfshirja e bullgarëve në Kushtetutë është vetëm një mekanizëm për përparimin drejt BE-së. “Kjo do të na çojë aty ku kemi synuar strategjikisht për dekada. Por kjo po paraqitet si tradhti, ndërsa në thelb mungojnë reformat, mungojnë prokurorët evropianë dhe transformimi i gjyqësorit, ndërsa krimi dhe korrupsioni vazhdojnë të lulëzojnë”, akuzoi Filipçe.
Ai përfundoi se qytetarët e shohin qartë se ky model çon drejt autoritarizmit, pasigurisë ekonomike dhe izolimit evropian, duke paralajmëruar se LSDM-ja do të vazhdojë ta denoncojë publikisht këtë kurs politik. Nga ana tjetër, VMRO-DPMNE reagoi me kundërakuza, duke theksuar se Filipçe është “i impresionuar nga bota serbe”, por sipas tyre, “dera e vetme për botën serbe në Maqedoni është vetë Venko Filipçe, i cili sillet si një Zaev i vogël”. “Nëse Zaevi luftonte për Bullgarinë, Venko lufton edhe për Bullgarinë edhe për një pjesë të botës serbe”, thuhet në reagimin e VMRO-DPMNE-së.
Partia në pushtet vazhdoi akuzat duke e lidhur Filipçen me ish-kryeministrin Zoran Zaev dhe me investime të dyshuara në Dubai. “Pranimi i Filipçes se ai nuk po ndërton ndërtesa me Zaevin në Dubai do të thotë pranim se Zaev po ndërton. Zaevi i vogël, Venko, duhet të përgjigjet se për çfarë dhe si e ka marrë vizën e artë në Dubai, ndërsa Zaev duhet të përgjigjet se si arriti te milionat me të cilat po ndërton atje”, theksojnë nga VMRO-DPMNE. Sipas partisë në pushtet, këto pretendime janë konfirmuar edhe gjatë një brifingu të Filipçes me gazetarët, ku ai mohoi përfshirjen personale në ndërtimet në Dubai, por, sipas VMRO-DPMNE-së, nuk e mohoi aktivitetin e Zaevit. Në fund, VMRO-DPMNE akuzon LSDM-në se gjatë shtatë viteve në pushtet ka shkatërruar shtetin, ekonominë dhe dinjitetin e qytetarëve./ koha.mk