Arma që ia vështirësoi jetën Vladimir Putinit, është tashmë pjesë e Forcës së Sigurisë së Kosovës!
Ushtria në formim e sipër, është pajisur me rreth 5 dronë “Bayraktar”, kapacitete që tejkalojnë nevojën e FSK-së.
Dronët inteligjentë, sulmues pa pilotë, që kontrollohen nga një bazë tokësore, kanë arritur në Kosovë nga vendi prodhues i dronëve dhe gjithë sistemit përcjellës, Turqia, pas gati 7 muajsh nga nënshkrimi i kontratës me kompaninë prodhuese. Ujdia ishte firmosur nga ministri i Mbrojtjes, Armend Mehaj.
Interesimi për t’u pajisur me këtë mjet ajror luftarak kishte nisur qysh në fillim të vitit 2022, veçmas pas pushtimit rus të Ukrainës më 24 shkurt 2022.
Por, është pikërisht furnizimi i FSK-së me këta dronë që e ka bërë Serbinë të tërhiqet nga blerja e tyre.
Kështu ka deklaruar presidenti serb, Aleksandar Vuçiq, sipas mediave serbe.
Ai ka thënë se ushtria e Serbisë është shumë më e fuqishme se ajo e Kosovës, por ka theksuar se FSK-ja vazhdimisht po pajiset dhe armatoset, në radhë të parë nga Turqia.
“Turqit u kanë dhënë mjete të blinduara shumë të fuqishme, mortaja, bajraktarë, obusa, këto janë të gjitha që i ka FSK-ja. Ata kanë optikë termike, me rreze të gjatë dhe duhet të jemi shumë të kujdesshëm dhe të kemi mjete adekuate nëse populli ynë kërcënohet”, ka deklaruar Vuçiqi, teksa ka shtuar se Serbia ka hequr dorë nga blerja e “Bayraktarëve” turq për shkak se Ankaraja ia ka dorëzuar ata Prishtinës.
“Ne nuk do të bashkëpunojmë me ta, sepse ata janë furnizuesit kryesorë të një shteti inekzistent”, tha presidenti serb, raporton “Vesti”.