Zëvendëskryeministri për Çështje Ekonomike dhe ministër i ekonomisë në Mal të Zi, Nik Gjeloshaj, ka përkujtuar sot 115-vjetorin e Kryengritjes së Malësisë, duke e cilësuar atë si një ndër momentet më të rëndësishme në historinë kombëtare shqiptare.
Në mesazhin e tij, ai theksoi se kjo kryengritje, e cila kulmoi me ngritjen e flamurit kombëtar pas pesë shekujsh robëri, përfaqëson një pikë kthese historike dhe i parapriu shpalljes së pavarësisë së Shqipërisë.
Gjeloshaj nënvizoi se më 6 prill 1911, nën udhëheqjen e Dedë Gjo Luli, Malësia dëshmoi trimëri, qëndresë dhe sakrificë për liri, duke lënë një trashëgimi të çmuar për brezat që vijnë.
Ai shtoi se kjo ngjarje mbetet një simbol i fortë i përpjekjeve shekullore për liri dhe identitet kombëtar, ndërsa bëri thirrje që kujtimi i kësaj sakrifice të ruhet dhe të përcillet brez pas brezi.
Ja postimi plotë:
Sot përkujtojmë me nderim 115 vjetorin e Kryengritjes së Malësisë, e cila kulmoi me ngritjen e flamurit kombëtar për herë të parë pas pesë shekujsh robëri.
Sipas historiografisë shqiptare, kjo kryengritje i tejkalon kufijtë lokalë, pasi shënon pikë kthese në historinë tonë kombëtare duke i paraprirë pavarësisë së Shqipërisë.
Prandaj, 6 Prilli i vitit 1911, me në krye me Dedë Gjo Lulin, mbetet dëshmi e qëndresës së Malësisë dhe e përpjekjeve të saj shekullore për liri.
Lavdia e tyre brez pas brezi u kujtoftë!
NGJ
