Kuvendi i Malit të Zi miratoi mbrëmë Ligjin për nëpunësit dhe punonjësit e administratës lokale, duke vendosur për herë të parë në Mal të Zi një sistem të unifikuar, gjithëpërfshirës dhe modern të shërbimit civil në nivel lokal. Me miratimin e këtij ligji, të hartuar nga Ministria e Administratës Publike, përmbyllet me sukses reforma gjithëpërfshirëse e sistemit të vetëqeverisjes lokale në vend dhe krijohet një kornizë ligjore në përputhje me standardet më të larta evropiane.
Mesazhi kryesor reformues i këtij ligji është ndarja e plotë dhe e qartë ndërmjet nivelit politik dhe atij profesional në komuna. Pozita të tilla si administratori kryesor, sekretari i kuvendit dhe drejtuesit e organeve të administratës lokale nuk do të jenë më objekt i marrëveshjeve apo kompromiseve politike, por do t’u besohen ekskluzivisht profesionistëve, të cilët funksionet e tyre i ushtrojnë mbi bazën e dijes, kompetencës dhe rezultateve të matshme në punë.
Me këtë rast, ministri i Administratës Publike, z. Marash Dukaj, deklaroi:
“Me miratimin e këtij ligji dërgojmë një mesazh të qartë dhe të vendosur: administrata lokale nuk duhet dhe nuk do të jetë më vend i kalkulimeve politike, por një hapësirë e profesionalizmit, ekspertizës dhe përgjegjësisë. Me këtë zgjidhje ligjore ndërtojmë një vetëqeverisje lokale të fortë dhe moderne, të orientuar ekskluzivisht drejt nevojave të qytetarëve tanë dhe kërkesave të integrimit evropian.”
Ligji i ri sjell edhe zgjidhje konkrete për sfidat specifike me të cilat përballen komunat. Ai parashikon një sistem bursash për profilet deficitare, si specialistët e teknologjisë së informacionit (IT), arkitektët dhe audituesit e brendshëm; krijon një treg të brendshëm të punës që mundëson lëvizshmërinë e të punësuarve ndërmjet komunave; si dhe zgjidh çështjen e punësimit sezonal të policëve komunalë dhe të ekspertëve për tërheqjen e fondeve nga Bashkimi Evropian.
Miratimi i këtij ligji nuk përfaqëson vetëm përmbushjen formale të njërit prej kritereve përfundimtare kyçe për mbylljen e negociatave në Kapitullin 23, por vendos gjithashtu një themel të fortë për stabilitetin dhe zhvillimin afatgjatë të Malit të Zi.
“Nuk hartojmë dhe miratojmë zgjidhje cilësore ligjore vetëm për t’u harmonizuar me Brukselin, por për të realizuar një transformim rrënjësor të shoqërisë. Pikërisht në këtë mënyrë ecim me hapa të shpejtë dhe të sigurt drejt anëtarësimit të plotë në Bashkimin Evropian”, theksoi ministri Dukaj.
