Nënkryetari i Kuvendit të Malit të Zi 🇲🇪, Nikolla Camaj, me rastin e 35-vjetorit të shpalljes së Malit të Zi shtet ekologjik:
“20 shtatori, Dita e Shtetit Ekologjik të Malit të Zi, është një mundësi për të kujtuar vlerën dhe rëndësinë e vendimit me të cilin, 35 vjet më parë, Mali i Zi e vendosi angazhimin për mbrojtjen e mjedisit ndër parimet më të rëndësishme të zhvillimit të tij.
Mali i Zi është një vend me pasuri të jashtëzakonshme natyrore. Nga veriu në jug, nga malet dhe pyjet deri te lumenjtë, liqenet dhe deti, natyra është pjesë përbërëse e jetës së njerëzve tanë, por edhe pjesë e identitetit që ndërtojmë së bashku, pavarësisht se ku jetojmë dhe cilës komunitet i përkasim.
Prandaj, mbrojtja e mjedisit nuk është çështje që i përket vetëm një institucioni, një komuniteti lokal apo një individi. Ajo është përgjegjësi e përbashkët dhe çështje e cilësisë së jetës së të gjithë qytetarëve. Mënyra se si i mbrojmë ujërat, pyjet, bregdetin dhe hapësirën, si sillemi ndaj mbetjeve dhe si i shfrytëzojmë burimet natyrore, tregon se sa të përgjegjshëm jemi ndaj së ardhmes sonë.
Ideja e Shtetit Ekologjik merr kuptim të plotë vetëm atëherë kur nuk mbetet në nivelin e një përcaktimi formal, por kur pasqyrohet në praktikën dhe jetën e përditshme të qytetarëve tanë. Fakti që Mali i Zi e shpalli veten shtet ekologjik 35 vjet më parë përfaqëson një vlerë të rëndësishme, por edhe një detyrim për të punuar vazhdimisht më shumë në këtë fushë.
Një përgjegjësi të veçantë kemi ndaj brezave që vijnë. Ajo që ruajmë sot u mbetet atyre, ashtu siç na është lënë neve ajo që kanë ruajtur brezat para nesh.
Në këtë kuptim, mbrojtja e mjedisit duhet të mbetet një nga përcaktimet e përbashkëta të shoqërisë sonë. Standardet evropiane për mbrojtjen e mjedisit mund të jenë një nxitje shtesë për ta kthyer këtë përgjegjësi edhe më fuqishëm në praktikë, por thelbi mbetet i njëjtë – ta ruajmë Malin e Zi si një hapësirë për jetë cilësore dhe të shëndetshme për të gjithë qytetarët e tij.
Duke mbrojtur natyrën e Malit të Zi, ne mbrojmë atë që është më e çmuara – hapësirën për jetë, një të ardhme të shëndetshme dhe trashëgiminë që ua lëmë brezave që vijnë.”
