Familja Veliu ka reaguar publikisht ndaj një vendimi që, sipas saj, vjen nga strukturat e pushtetit, duke e cilësuar atë si një tjetër përpjekje për presion dhe intimidim.
Në një deklaratë publike, familja shprehet se nuk do të tërhiqet përballë vendimeve të marra “nga lart” dhe thekson se nuk kërkon privilegje apo favore, por drejtësi, respekt dhe të drejtën për të mbrojtur qëndrimin e saj.
“Shumë larg dallojmë ne nga ju! Ne nuk pranojmë ‘odlluka’”, thuhet në deklaratë.
Familja Veliu akuzon palën tjetër për shërbim ndaj pushtetit dhe interesave të momentit, ndërsa thekson se vetë ka zgjedhur të qëndrojë në anën e parimit, fjalës dhe dinjitetit.
“Nëse mendoni se me presion, me pushtet apo me vendime nga lart mund të na frikësoni, ta dini se keni zgjedhur derën e gabuar”, shprehet familja.
Sipas deklaratës, kjo situatë konsiderohet si “një sprovë e radhës”, ndërsa familja pretendon se ndër vite ka përballuar presione dhe padrejtësi të tjera, të cilat, sipas saj, kanë qenë shumë më të rënda.
Familja Veliu nënvizon se nuk kërkon trajtim të veçantë.
“Nuk kërkojmë privilegje. Nuk kërkojmë favore. Nuk kërkojmë trajtim të veçantë. Kërkojmë vetëm drejtësi, respekt dhe të drejtën për të qëndruar në anën tonë të historisë dhe të së vërtetës”, thuhet në reagim.
Në fund të deklaratës, familja përcakton qartë qëndrimin e saj ndaj pushtetit dhe vendimeve të tij, duke theksuar:
“Ju zgjidhni pushtetin. Ne zgjedhim qëndrimin.
Ju zgjidhni interesin. Ne zgjedhim dinjitetin.
Ju zgjidhni urdhrin. Ne zgjedhim fjalën.”
Familja Veliu deklaron se nuk pendohet për qëndrimin e mbajtur dhe nuk kërkon falje për të.
“Në fund, nuk janë zyrat që përcaktojnë se kush kishte të drejtë. Është koha. Është vepra. Është kujtesa.”
Deklarata mban firmën e Luan Veliut dhe është bërë publike më 15 shtator 2026.
Ja postimi plotë:
DEKLARATË PUBLIKE
Familja Veliu
Shumë larg dallojmë ne nga ju!
Ne nuk pranojmë “ODLLUKA”
Ju, yzmeqarë të pushtetit dhe të interesave të çastit; ne, njerëz që kemi zgjedhur të qëndrojmë në anën e parimit, të fjalës dhe të dinjitetit.
Edhe këtë e pranojmë. E konsiderojmë një sprovë të radhës, një tjetër “taksirat” që vjen nga drejtoratet e mëdha. Madje, krahasuar me sprovat, presionet dhe padrejtësitë që kemi përballuar ndër vite, kjo e fundit është shumë e butë dhe lehtë e përballueshme.
Prandaj, vetëm vazhdoni!
Ju lumtë, more!
Nëse mendoni se me presion, me pushtet apo me vendime nga lart mund të na frikësoni, ta dini se e keni zgjedhur derën e gabuar.
Familja Veliu nuk është mësuar të përkulet para pushtetit. Ne e dimë çfarë do të thotë të paguash çmim për një qëndrim, të mbrosh një bindje dhe të mos e shesësh fjalën për interesa të momentit.
Dallimi mes nesh është i madh.
Ju mund ta keni pushtetin, por ne kemi kujtesën, fjalën dhe qëndrimin.
Ju mund të merrni vendime nga zyrat tuaja, ne kemi mësuar t’i përballojmë pasojat e vendimeve të tilla me kokën lart.
Nuk kërkojmë privilegje.
Nuk kërkojmë favore.
Nuk kërkojmë trajtim të veçantë.
Kërkojmë vetëm drejtësi, respekt dhe të drejtën për të qëndruar në anën tonë të historisë dhe të së vërtetës.
Prandaj, mos e ngatërroni heshtjen me frikën dhe durimin me dorëzimin.
Ne kemi duruar shumë më tepër se kaq.
Kemi parë pushtete të vijnë e të shkojnë, ndërsa fjala dhe qëndrimi mbeten.
Kështu që vazhdoni në rrugën tuaj, ndërsa ne do të vazhdojmë në tonën.
Në fund, nuk janë zyrat që përcaktojnë se kush kishte të drejtë. Është koha. Është vepra. Është kujtesa.
Ne mbetemi dy anë të kundërta dhe dallimi mes nesh është i qartë:
Ju zgjidhni pushtetin.
Ne zgjedhim qëndrimin.
Ju zgjidhni interesin.
Ne zgjedhim dinjitetin.
Ju zgjidhni urdhrin.
Ne zgjedhim fjalën.
Dhe për këtë dallim, nuk pendohemi dhe nuk kërkojmë falje.
Familja Veliu
Luan Veliu
Sërmnovë, 15.09.2026
