Deputeti i Bashkimi Demokratik për Integrim, Blerim Bexheti, ka reaguar ndaj debatit të fundit publik rreth statusit të gjuhës shqipe në Maqedonia e Veriut, duke kritikuar deklaratat e disa politikanëve shqiptarë që, sipas tij, relativizojnë pozitën kushtetuese dhe institucionale të shqipes në vend.
Në një reagim publik, Bexheti thekson se sa herë që hapet çështja e statusit të gjuhës shqipe në Maqedoninë e Veriut, del në pah një realitet shqetësues: problemi nuk qëndron vetëm te ata që historikisht kanë kundërshtuar avancimin e saj, por edhe te disa përfaqësues politikë shqiptarë që sot pretendojnë se përfaqësojnë interesat e shqiptarëve.
Sipas tij, debati është intensifikuar pas deklaratave të ish-presidentit të vendit, Stevo Pendarovski, i cili ka theksuar se shqipja është gjuhë zyrtare dhe se çdo cenim i ligjit që rregullon përdorimin e saj mund të krijojë probleme serioze për funksionimin e shtetit dhe për marrëdhëniet ndëretnike.
Në të njëjtën kohë, kryeministri i Kosovës, Albin Kurti, ka deklaruar se në Maqedoninë e Veriut nuk mund të thuhet se shqipja ka qenë gjuhë zyrtare dhe se nuk ekziston një ligj për përdorimin e saj, deklaratë që ka nxitur reagime dhe interpretime të ndryshme në opinionin publik.
Debati u thellua më tej edhe nga deklaratat e zëvendëskryeministrit Izet Mexhiti, i cili tha se “Kurti e ka thënë të vërtetën”, si dhe nga qëndrimi i kryetarit të Kuvendit, Afrim Gashi, i cili e përshkroi shqipen si “gjuhë të përkthyer”.
Sipas Bexhetit, këto deklarata jo vetëm që krijojnë konfuzion në opinion, por edhe ulin peshën politike dhe institucionale të gjuhës shqipe në shtet. Ai vlerëson se përmes deklaratave të tilla krijohet perceptimi se shqiptarëve në Maqedoninë e Veriut u mbetet që gjuhën e tyre ta mbrojë një ish-president maqedonas, ndërsa vetë përfaqësuesit politikë shqiptarë merren me relativizimin e statusit të saj.
“Është paradoksale që vota të kërkohet me flamur, me gjuhë, me dinjitet dhe me barazi, ndërsa sapo të vijë momenti për ta mbrojtur atë në mënyrë të qartë dhe pa ekuivok, shqipja për disa bëhet herë ‘jo zyrtare’, e herë edhe ‘gjuhë e përkthyer’”, thekson deputeti i BDI-së.
Ai shton se kjo situatë nuk përbën vetëm një mospërputhje politike, por reflekton një krizë më të thellë të përfaqësimit politik shqiptar në vend.
Sipas Bexhetit, kur vetë përfaqësuesit politikë shqiptarë nuk flasin qartë për statusin e gjuhës shqipe, ata jo vetëm që nuk e mbrojnë atë, por edhe relativizojnë rrezikun që mund të vijë nga çdo përpjekje për ta dobësuar apo për ta vënë në pikëpyetje pozitën e saj përmes proceseve institucionale, përfshirë edhe vendimet e mundshme të Gjykatës Kushtetuese.
Ai thekson se gjuha shqipe nuk është një favor politik dhe as një element simbolik apo protokollar në institucionet shtetërore, por një e drejtë e fituar përmes sakrificës dhe përpjekjeve të gjata politike të shqiptarëve në vend.
“Gjuha shqipe nuk është dekor protokollar dhe as ‘gjuhë e përkthyer’. Ajo është çështje dinjiteti, barazie dhe pozicioni kushtetues në shtet”, thekson Bexheti.
Në reagimin e tij, ai nënvizon se problemi më i madh për gjuhën shqipe nuk është vetëm kush e sulmon apo e konteston hapur atë, por edhe mungesa e mbrojtjes së qartë nga ata që kanë marrë mandatin për të përfaqësuar shqiptarët.
Sipas tij, pikërisht në këtë moment shihet edhe, siç e quan ai, “nënshtrimi politik” i disa përfaqësuesve të koalicionit VLEN, të cilët, sipas tij, erdhën në pushtet me premtime për dinjitet dhe barazi, por në momentin kur u hap debati për gjuhën shqipe zgjodhën relativizimin në vend të një qëndrimi të qartë politik.
Në fund të reagimit, deputeti i BDI-së thekson se shqiptarët në Maqedoninë e Veriut historikisht kanë ditur ta mbrojnë vetë dinjitetin dhe të drejtat e tyre, ndërsa sfida kryesore sot, sipas tij, mbetet sigurimi i një përfaqësimi të denjë politik që mbron pa kompromis të drejtat e fituara.
