Grupi i Këshilltarëve të Aleancës për Integrim (AKI) në Këshillin e Qytetit të Shkupit ka refuzuar të pranojë certifikatat për mandat, me arsyetimin se ato janë lëshuar vetëm në një gjuhë, duke mos respektuar Ligjin për përdorimin e gjuhëve.
Në reagimin e tyre, këshilltarët e AKI-së theksojnë se nuk do ta kalojnë këtë akt, derisa Komisioni Shtetëror i Zgjedhjeve (KSHZ) të bëjë korrigjimin e certifikatave dhe t’i lëshojë ato edhe në gjuhën shqipe, ashtu siç parashikon ligji.
“Kërkojmë nga KSHZ që të korrigjojë menjëherë certifikatat dhe të respektohet Ligji për dygjuhësi. Shqiptarët janë pjesë përbërëse e këtij shteti dhe gjuha shqipe duhet të trajtohet me barazi të plotë në çdo dokument zyrtar”, thuhet në reagim.
Këshilltarët e AKI-së u kanë bërë thirrje edhe kolegëve të tyre nga koalicioni “Vlen”, që t’i kthejnë certifikatat e pranuara dhe të kërkojnë bashkërisht zbatimin e Ligjit për dygjuhësi.
“Edhe pse i morën Këshilltarët e Vlenit, kërkojmë që t’i kthejnë certifikatat dhe të bëhen pjesë e kësaj kërkese të drejtë. Respektimi i gjuhës shqipe është detyrim ligjor dhe moral ndaj qytetarëve shqiptarë të Shkupit”, thuhet më tej në reagimin e Selamit.
