Kryetari i Bashkësisë Fetare Islame të RMV-së, Reisul Ulema H. hfz. Shaqir ef. Fetahu, i shoqëruar nga Drejtori i Agjensionit për Hallall Standard pranë BFI-së, z. Driton Dikena, priti në kabinetin e tij ndihmës-dekanin e Fakultetit të Sheriatit pranë Universitetit të Jordanisë, njëkohësisht ligjërues në Departamentin e financave islame në të njëjtin Universitet, Dr. Muneer M. Alshater, i cili shoqërohej nga z. Fuat Shabani.
Reisul Ulema, pasi u uroi mirëseardhjen mysafirëve, i informoi ata për aktivitetet e BFI-së, duke theksuar veçanërisht rëndësinë që ky institucion i kushton dijes dhe shkencës. Ai nënvizoi se fokusi më i madh i BFI-së është drejtuar drejt Medresesë “Isa Beu” dhe Fakultetit të Shkencave Islame, si dy shtylla të pazëvendësueshme të edukimit fetar e arsimor në vend.
Reisul Ulema në fjalën e tij gjithashtu theksoi se BFI-ja udhëhiqet nga dy parime themelore: morali fetar dhe zhvillimi ekonomik i qëndrueshëm i BFI-së. Ai tha se këto dy shtylla janë garanci që institucionet e Bashkësisë Fetare Islame të ruajnë identitetin dhe misionin shpirtëror, por njëkohësisht të kontribojnë në zhvillimin e përgjithshëm të shoqërisë. Ai nënvizoi se menaxhimi i kujdesshëm i mbi 700 xhamive, 5 (pesë) Medreseve, Fakultetit të Shkencave dhe institucioneve të tjera fetaro-arsimore është dëshmi e përkushtimit të përditshëm të BFI-së për forcimin e jetës fetare dhe edukimin e brezave të rinj me dije dhe vlera islame.
Nga ana e tij, Dr. Muneer M. Alshater u shpreh thellësisht i impresionuar nga puna kolosale e BFI-së, duke e vlerësuar këtë institucion si një model frymëzues në rajon për mënyrën se si ka arritur të balancojë traditën islame me sfidat moderne të shoqërisë.
Ai ndau përvojën e tij akademike e kërkimore në Universitetin e Jordanisë, duke theksuar se institucionet islame sot duhet të shërbejnë si ura lidhëse mes dijes tradicionale dhe risive shkencore. Në këtë kontekst, ai foli për aktivitetet e tij në institucionet ndërkombëtare në fushën e financave islame, makro-financave dhe teknologjisë financiare (FinTech), fusha këto që sot po marrin gjithnjë e më shumë rëndësi në botën islame.
Në përfundim të takimit, palët u dakorduan për thellimin e bashkëpunimit institucional, me fokus të veçantë në organizimin e konferencave ndërkombëtare dhe zhvillimin e programeve të përbashkëta shkencore, sidomos në fushën e ekonomisë dhe financave hallall, duke e parë këtë si një nevojë strategjike për të ardhmen.
Ky takim dëshmoi edhe një herë se Bashkësia Fetare Islame është e hapur ndaj botës akademike ndërkombëtare dhe se ajo synon ta përforcojë rolin e saj si një urë që lidh traditën fetare me shkencën bashkëkohore, duke e bërë Islamin një faktor aktiv të zhvillimit të shoqërisë moderne.
