Sot, që nga orët e para të mëngjesit, pata kënaqësinë dhe nderin të jem pjesë e një aktiviteti tradicional që ruan jo vetëm dashurinë për sportin, por edhe lidhjet e shpirtit me rrënjët tona.
Së bashku me Ambasadorin e Republikës së Maqedonisë në Bernë, z. Rexhep Demiri, sekretari i dytë i Ambasadës së Kosovës z. Gjenis Haxhimehmeti, Shefin e Konsullatës së Kosovës në Cyrih, z. Vigan Berisha, Sekretarin e Parë të Ambasadës së Shqipërisë në Bernë z. Valon Gashi dhe Drejtori për Diasporën i RKS Elis Badalli, morëm pjesë në Turneun Tradicional të Futbollit, organizuar nga Shoqata Kulturore “Kërçova – Zvicër”, në Derendingen, nën udhëheqjen e kryetarit Resul Mehmedi.
Ky turne nuk ishte vetëm një garë sportive – ishte një takim që mblodhi të tre diplomatët shqiptar , një festë shqiptarie, një përqafim i shpirtit komunitar.
Takuam shumë dashamirë të sportit, njëkohësisht edhe ekipin nga komuna e Kërçovës me kryetar z. Fatmir Dehari, takuam edhe shumë bashkëvendas, aktivistë, afaristë, miq dhe personalitete të cilët i vlerësoj për kontributin e tyre të palodhur ndaj komunitetit dhe identitetit tonë kombëtar.
Të jesh në mesin e vendasve, me tingujt e shqipes, me mallin e vendlindjes që e ndan në sy e në buzëqeshje – ndihesh si në shtëpi.
Sepse aty ku janë njerëzit e tu, aty është Shqipëria e zemrës.
