Shfrytëzojeni momentin, u tha euroambasadori Mihalis Rokas deputetëve të Komisionit për çështje europiane. Sipas tij, ka vullnet në Bruksel për hapjen e kapitujve me Maqedoninë. Ai vlerësoi se për shkak të polarizimit politik, përbërja e fundit e Kuvendit nuk arriti t’i miratojë ndryshimet kushtetuese.
Megjithatë, sipas deputetit të VMRO-DPMNE, Antonijo Milloshoski, te partitë ka konsensus për anëtarësim në BE, por dallohet rruga që do të na çojë në BE.
Milloshoski theksoi se për këtë çështje duhet të fillohet dialog dhe iu përgjigj euroambasadorit Rokas se jo të gjitha vendet anëtare kanë vullnet për zgjerimin e BE-së. Pjesë e eurodeputetëve të cilët marrin pjesë në Komitetin e përzier me Maqedoninë, shpresojnë për lëvizje me qeverinë e re të Bullgarisë.
Paraprakisht, pushteti i ri në Bullgari theksoi se do ta përkrahin zgjerimin e BE-së vetëm në bazë të asaj që tashmë është dakorduar.
