Gjykata e Apelit e ka hequr aktgjykimin e shkallës së parë për rastin “Besa Trans” dhe lënda është kthyer në gjykim të sërishëm.
Nga Gjykata e Apelit për MIA-n konfirmojnë se ka vendim për lëndën dhe se tashmë është kthyer në gjykatën e shkallës së parë.
“Vendimi është hequr, ankesat e të akuzuarit si person fizik dhe juridik janë pranuar. Pas ankesave dhe sipas detyrës zyrtare, aktgjykimi është hequr dhe lënda është kthyer në gjykim të sërishëm”, informojnë nga Gjykata e Apelit.
Prej aty potencojnë se vendimi tashmë është bërë anonim dhe do të shpallet publikisht në ueb faqen e Gjykatës.
Për rastin, i cili ka të bëjë me veprën e vazhduar penale “falsifikim i dokumentit”, Gjykata penale Shkup në mars të këtij viti, ka shqiptuar një vit e tetë muaj dënim me burg për pronarin e “Besa Trans”-it, Bekim Haxhiu dhe dënim me para prej 800.000 denarëve, si dhe ndalesë katërvjeçare për kryerjen e transportit ndërkombëtar për personin juridik.
