Në Prishtinë është përkujtuar një nga ngjarjet më të rëndësishme të historisë sonë së re – themelimi i Ushtrisë Çlirimtare të Kosovës 30-vjet më parë, eveniment në të cilin u nderuan lajmëtarët e lirisë, dëshmorët e kombit kombëtar shqiptar.
Në një akademi solemne organizuar nga Shoqëria Lëvizja, organizatat e dala nga lufta e UÇK-së, ITSHKSH Shkup dhe Shoqata e të Burgosurve Politikë, Bekim Adili nga Shoqëria Lëvizja, ka folur mbi themelimin e UÇK-së dhe vendimin e madh që u mor më 17 Nëntor 1994.
Një fjalë rasti ka mbajtur edhe ish-anëtari i kryesisë së LPK-së Ramadan Avdiu, i cili foli mbi periudhën e kohës së okupimit të shqiptarëve nga ish-regjimi duke u privuar nga të gjitha të drejtat e tyre.
Sekretari i LPK-së Emrush Xhemajli ka sjellë para të pranishmëve kujtime nga momenti historik i emërtimit të UÇK-së 30 vjet më parë.
Kryetari i BDI-së Ali Ahmeti ka folur mbi rrugëtimin e shqiptarëve në luftën e tyre për liri.
“Qëndresa e luftëtarëve të lirisë kryesuar nga Shaban Polluzha, të vazhduar nga Shaban Jashari me pushkën e lirisë së bashku me djemtë e tij të përbetuar liri a vdekje Rexhep Mala, Nuhi Berisha, Bajram Bahtiri, Zia Shemsiu, Afrim Zhitia, Fahri Fazliu dhe shumë të tjerë, lindi ideja e themelimit të Ushtrisë së parë çlirimtare – sublimet e popullit të Kosovës e viseve shqiptare nën Jugosllavi, nën domosdoshmërinë për të legjitimuar luftën për liri, pavarësi”, tha Ahmeti.
