Ivan Ivanaj ka shprehur kënaqësinë për bashkimin e tri subjekteve politike shqiptare në një parti të vetme, e cila tashmë do të veprojë nën emrin Forumi Shqiptar.
Përmes një mesazhi publik, Ivanaj rikujtoi se bashkimi i forcave politike shqiptare kishte qenë një nga synimet e tij më të mëdha që në fillimet e angazhimit në politikë.
Ai theksoi se hapi i parë drejt këtij qëllimi ishte ndërmarrë në vitin 2019, kur bashkimi i forcave politike solli besimin e qytetarëve dhe rezultate konkrete.
Shtatë vjet më vonë, ky proces ka marrë një dimension të ri, duke kulmuar me bashkimin e tri subjekteve politike në një parti të vetme – Forumin Shqiptar.
Ivanaj falënderoi të gjithë kontribuuesit e këtij procesi, si dhe ata që i besuan detyrën e Zëvendëskryetarit të Forumit Shqiptar.
Në mesazhin e tij, ai përcolli edhe një thirrje për unitet dhe tejkalim të ndarjeve të mëparshme politike, duke e përmbyllur me sloganin:
“Nga sot nuk ka më tanët dhe tuajt. Ka vetëm TANËT!”
Ja postimi plotë:
Kur hyra në politikë, një nga ëndrrat e mia më të mëdha ishte që një ditë të arrinim te bashkimi i forcave politike shqiptare në një subjekt të vetëm.
Në vitin 2019 hodhëm hapin e parë. Bashkuam forcat, fituam besimin e qytetarëve dhe dëshmuam se bashkimi sjell suksese.
Sot, shtatë vjet më vonë, nga tri subjekte politike u bëmë një parti e vetme – FORUMI SHQIPTAR!
Falënderoj të gjithë ata që kontribuuan në këtë rrugëtim, si dhe të gjithë ata që më dhanë besimin për detyrën e Zëvendëskryetarit të Forumit Shqiptar.
Nga sot nuk ka më tanët dhe tuajt. Ka vetëm TANËT!
