Zekiria Lamallari, një solo këngëtar i diplomuar dhe pjesëtar i familjes së njohur muzikore Lamallari, është një artist multidimensional me një shije të veçantë artistike. Për pesë vite rresht, Zekiriaja ishte solist i Ansamblit Shtetëror të Këngëve dhe Valleve në Maqedoninë e Veriut, duke i dhuruar publikut interpretime të jashtëzakonshme dhe duke përfaqësuar me dinjitet artin dhe kulturën shqiptare.
Fatkeqësisht, Zekiria Lamallari është larguar nga Ansambli në një mënyrë që cenon jo vetëm personalitetin e tij si artist, por edhe vlerat dhe traditat që ky Ansambël përfaqëson. Një padrejtësi e tillë ndaj një artisti të këtij niveli është e papranueshme dhe kërkon vëmendjen dhe reagimin e menjëhershëm të institucioneve kulturore.
Si ish-drejtor i Ansamblit Shtetëror për pesë vite, ndiej për obligim moral dhe profesional të ngre zërin kundër këtyre praktikave të papranueshme, që po rrezikojnë seriozisht trashëgiminë dhe të ardhmen e këtij institucioni të rëndësishëm. Zekiria Lamallari dhe artistët e tjerë që janë larguar padrejtësisht duhet të rikthehen në vendet e tyre të punës. Vetëm kështu mund të mbrohet dinjiteti i artistëve dhe të sigurohet një e ardhme më e ndritur për Ansamblin Shtetëror dhe kulturën tonë kombëtare.
Apeloj me gjithë forcën time: Riktheni Zekiria Lamallarin dhe artistët e tjerë në vendet e tyre të merituara!
Me respekt të lartë,
Shkodran Tolaj
Ish-drejtor i Ansamblit Shtetëror
