Profesor Bekim Fetaji dje është zgjedhur rektor i ri i Universitetit Shtetëror “Nënë Tereza” në Shkup. Kështu ka bërë të ditur komisioni zgjedhor. Megjithatë, të pakënaqurit me këto zgjedhje tashmë raportojnë të dhëna për parregullsi gjatë votimit.
Të drejtë vote kishin të gjithë profesorët dhe asistentët dhe një përfaqësues studentor nga secili fakultet. Pas numërimit të votave, Fetaji u shpall fitues me 38 vota, tre vota më shumë se kandidati kundërshtar, prof.dr Blerim Saiti. Pas përfundimit të votimit, kryetari i Komisionit Zgjedhor Zoran Gatovski, deklaroi se zgjedhjet kanë përfunduar me sukses.
Mirëpo, të pakënaqurit me këtë rezultat thonë se ka pasur presion mbi votuesit dhe bëjnë të ditur më shumë detaje për ditën e sotme.
Bekim Fetaji është inxhinier i IT-së, në biografinë e të cilit thuhet se ka diplomuar në Universitetin “Shën Kiril dhe Metodi” në Shkup, studimet master i kreu në Oksford të Mbretërisë së Bashkuar dhe doktoraturën në shkencat teknologjike në Graz të Austrisë.
Kundërshtari i tij, Blerim Saiti, është profesor i fizikës. Sipas CV-së, ai ka kryer studimet universitare dhe master në Institutin e Edukimit Fizik në Universitetin e Tiranës, si dhe ka doktoruar në “Shën Kirili dhe Metodi” në Shkup në vitin 2013.
Bekim Fetaji pritet të marrë zyrtarisht mandatin e rektorit të hënën. Ai do të jetë rektori i tretë pas Izet Zeqirit dhe Aziz Pollozhanit.
Rektori i ri do të jetë përgjegjës edhe për menaxhimin e 34.5 milionë eurove që Qeveria e Maqedonisë i ka ndarë për ndërtimin e kampusit të ri universitar të Universitetit “Nënë Tereza”.
