Shoqata e të Burgosurve Politik të Kosovës ka nderuar sot heroin e kombit Afrim Zhitia, me rastin e inaugurimit të shtatores së tij, duke vendosur kurora me lule të freskëta dhe duke kujtuar sakrificën e tij për lirinë dhe pavarësinë e vendit.
Në këtë ceremoni solemne, e cila mblodhi përfaqësues të institucioneve, organizatave dhe qytetarë të shumtë, u theksua se figura e Afrim Zhitias mbetet frymëzim i përhershëm për gjeneratat e reja. Përfaqësues të Shoqatës së të Burgosurve Politik theksuan se akti i tij heroik është një dëshmi e vendosmërisë së popullit shqiptar për liri dhe dinjitet.
“Ne, si të burgosur politik, dhe shokë të burgut, e ndjejmë obligim moral dhe historik që gjithmonë të jemi pranë veprës së Afrim Zhitias dhe të gjithë dëshmorëve të kombit. Ai u bë simbol i guximit dhe sakrificës, duke treguar se rruga e lirisë kërkon përkushtim dhe flijim,” u shpreh njëri nga përfaqësuesit e Shoqatës.
Homazhe para shtatores së Afrim Zhitisë bënë dhe shokët e burgut nga Zabella e Pozharevcit, bashkëvuajtës me Afrim Zhitinë, si : Nezir Myrtaj, Bajrush Xhemajli, Xhevat Ademi, Murat Bytiqi, Ibrahim Xhemajli, Selim Lulaj, Avdush Nimani, shokë të cilët me Afrimin ka qenë në burgun e Pozharevcit.
Afrim Zhitia u lind në vitin 1965 dhe ra heroikisht më 2 nëntor 1989, në moshën 24-vjeçare, duke luftuar kundër forcave serbe. Sot ai kujtohet si një nga figurat më të ndritura të rezistencës shqiptare në Kosovë.
Vendosja e kurorave nga Shoqata e të Burgosurve Politik shënoi një moment të veçantë nderimi, duke e bërë edhe më domethënës inaugurimin e shtatores së heroit, që tashmë do të qëndrojë si kujtesë e gjallë në zemrën e kryeqytetit.
