Ministria e Vetëqeverisjes Lokale së bashku me Byronë për Zhvillim Rajonal siguruan mbështetje nga UNDP dhe Agjencia Suedeze për Bashkëpunim Zhvillimor për të mbështetur komunat në përgatitjen e dokumentacionit të projekteve, njofton PRESSonline.mk. Komunat, veçanërisht ato më të voglat që kanë burime të kufizuara njerëzore dhe financiare, e kanë të vështirë të përgatisin projekte më të mëdha infrastrukturore që kërkojnë dokumentacion të gjerë teknik, sipas standardeve të institucioneve të mëdha financiare si BE-ja, Banka Botërore e të tjera, tha ministri i Vetëqeverisjes Lokale, Risto Penov.
Vlera totale e projektit “Forcimi i kapaciteteve komunale për zbatimin e projekteve” është 2.6 milionë dollarë, nga të cilat 1.8 milionë dollarë janë siguruar nga Agjencia Suedeze për Bashkëpunim Ndërkombëtar për Zhvillim (SIDA), 500.000 dollarë nga Byroja për Zhvillim Rajonal dhe bashkëfinancim rreth 240 mijë dollarë pritet të sigurohet nga komunat. Për fondin teknik për përgatitjen e dokumentacionit të projekteve janë ndarë 1.5 milionë dollarë.
“Ekzistojnë shumë burime fondesh për financimin e projekteve, por është e nevojshme të ketë një projekt të mirë, të plotë dhe konkurrues. Përvoja e deritanishme tregon se nuk ka ofertë cilësore të projekteve nga komunat edhe kur kemi siguruar mjete. Në procesin e integrimit në Bashkimin Evropian, përveç harmonizimit të legjislacionit, duhet të tregojmë kapacitete për të zbatuar fondet e Bashkimit Evropian, sipas rregullave të tyre” – sqaroi Penov.
Thirrja e parë për komunat dhe qendrat zhvillimore pritet që në muajin prill.
“Është e rëndësishme që projektet të ndjekin tendencat e zhvillimit global dhe të përshtaten në axhendën globale për zhvillim të qëndrueshëm, të gjelbër dhe gjithëpërfshirës, në mënyrë që të njihen dhe të renditen lart nga institucionet financiare. E kanë përkrahjen, shpresoj që komunat ta shfrytëzojnë me mençuri që procesi të mbyllet deri në fund, deri në realizimin e plotë të projekteve që do t’i ofrojnë” – tha ministri i Vetëqeverisjes Lokale Risto Penov.
