Në lagjen Radishan të Komunës së Butelit është vendosur sot gurthemeli i një pishine moderne të mbyllur pranë shkollës fillore “Aco Shopov”, një projekt që synon të forcojë infrastrukturën sportive dhe të promovojë stilin e shëndetshëm të jetesës tek të rinjtë.
Në ceremoninë e fillimit të punimeve morën pjesë kryetari i Komunës së Butelit, Darko Kostovski, kryeministri i Republikës së Maqedonisë së Veriut Hristijan Mickoski, si dhe ministrja e Arsimit dhe Shkencës Vesna Janevska.
Kostovski theksoi se objekti i ri do të përfaqësojë një hap të rëndësishëm në zhvillimin e sportit lokal dhe në krijimin e kushteve moderne për nxënësit, sportistët dhe qytetarët e komunës. Sipas tij, investimi është pjesë e një vizioni më të gjerë për përmirësimin e infrastrukturës publike dhe rritjen e cilësisë së jetesës në komunë.
Pishina e mbyllur pritet të përfundojë brenda 18 muajsh dhe do të ndërtohet sipas standardeve bashkëkohore, duke përfshirë katër korsi për not, dhoma zhveshjeje dhe ambiente ndihmëse. Objekti do të ketë formë drejtkëndore dhe do të jetë i përshtatur për stërvitje dhe gara sipas rregullave të Federatës Botërore të Notit (FINA).
Investimi kap vlerën prej 77 milionë denarësh dhe, sipas autoriteteve lokale, synon të krijojë jo vetëm kushte për zhvillimin e talenteve sportive, por edhe hapësira rekreative për të gjithë banorët.
Në fund të deklaratës, Kostovski falënderoi kryeministrin Mickoski për mbështetjen e vazhdueshme ndaj projekteve në Komunën e Butelit, duke theksuar se investime të tilla do të vazhdojnë me dinamikë të lartë në të ardhmen.
