Kryetari i degës së BDI-së në Shuto Orizarë, z. Iljas Leskovica, ka reaguar pas vendimit të Gjykatës Administrative lidhur me çështjen e drejtimit të shkollës fillore “26 Korriku”. Ai theksoi se institucionet kompetente kanë konstatuar se largimi i drejtoreshës së mëparshme është bërë në mënyrë të paligjshme, ndërsa emërimi i Driton Ganiut si drejtor nuk është i bazuar në ligj.
“U fitua edhe një betejë. Gjykata Administrative sot vërtetoi se emërimi aktual për drejtor nuk është i ligjshëm dhe kjo do të ketë pasoja. Edhe nëse paraqitet një ankesë tjetër, është e kotë, sepse e drejta nuk mund të shtrembërohet”, deklaroi Leskovica.
Ai i bëri thirrje Ministres së Arsimit që të ndërmarrë masat e nevojshme për të respektuar vendimin e gjykatës dhe për të shkarkuar drejtorin e emëruar në mënyrë jo ligjore. Leskovica paralajmëroi gjithashtu se çdo vendim i marrë nga drejtori aktual do të dërgohet në institucionet përkatëse për procedura të mëtejshme ligjore.
