Forumi Shqiptar ka bërë hapjen zyrtare të Akademisë Politike, një nismë e dedikuar fuqizimit të të rinjve përmes edukimit, zhvillimit të aftësive dhe përgatitjes së tyre për një rol më aktiv në jetën publike dhe shoqërore.
Aktiviteti mblodhi një numër të madh të rinjsh, duke dëshmuar interesimin dhe gatishmërinë e tyre për t’u përfshirë në procese që kontribuojnë në zhvillimin personal, profesional dhe qytetar.
Organizatorët vlerësuan se Akademia Politike do të shërbejë si një platformë e rëndësishme për formimin e një brezi të ri liderësh, të pajisur me njohuri, vizion dhe përgjegjësi shoqërore.
Në sesionin inaugurues, pjesëmarrësit patën mundësinë të dëgjojnë ligjëratën e të ftuarës speciale, Grida Duma, e cila ndau përvojën e saj në fushën e lidershipit, komunikimit dhe angazhimit publik. Ajo theksoi rëndësinë e edukimit, mendimit kritik dhe përkushtimit në ndërtimin e një shoqërie më të zhvilluar dhe më demokratike.
Përfaqësuesit e Forumit Shqiptar shprehën mirënjohje për të gjithë të rinjtë që iu bashkuan kësaj nisme, duke theksuar se Akademia Politike është vetëm fillimi i një rrugëtimi që synon të frymëzojë, edukojë dhe të krijojë ura bashkëpunimi për të ardhmen.
Kjo akademi pritet të zhvillojë një sërë aktivitetesh, ligjëratash dhe trajnimesh, duke ofruar mundësi konkrete për avancimin e njohurive dhe aftësive të të rinjve shqiptarë.
