Kryetari i Shoqatës “Jehona e Malësisë”, z. Agron Dedivanaj, ka reaguar ashpër ndaj çdo përpjekjeje për të kufizuar apo ndaluar përdorimin e flamurit kombëtar shqiptar nga individë apo sportistë që përfaqësojnë komunitetin e tyre në skenën publike.
“Nuk mund dhe nuk duhet të ndëshkohet askush për manifestimin e identitetit kombëtar. Flamuri nuk është një zbukurim, por një simbol i historisë, sakrificës dhe aspiratave kolektive të popullit tonë,” deklaroi z. Dedivanaj.
Ai theksoi se çdo tentativë për ta relativizuar apo zbehur kuptimin e flamurit përbën cenim të lirisë së shprehjes dhe një akt politik të mohimit të qenies kombëtare.
“Flamuri është thelbi i vetëdijes sonë kombëtare dhe historike. Ai nuk është një zgjedhje e rastësishme, por një përkatësi që buron nga e kaluara jonë e përbashkët dhe që na obligon ta mbrojmë me dinjitet dhe vendosmëri. Për sa kohë ekziston ky identitet, askush nuk do të mund ta tjetërsojë dot,” shtoi më tej kryetari i Shoqatës “Jehona e Malësisë”.
Dedivanaj ka bërë thirrje që të respektohen të drejtat themelore të qytetarëve për të shprehur lirshëm përkatësinë e tyre kombëtare dhe që institucionet të mos bien pre e presioneve politike që synojnë të zbehin simbolet kombëtare.
Ja postimi plotë:
Shprehja e identitetit kombëtar përmes simbolit të flamurit është një akt i natyrshëm dhe i pandashëm nga vetë ekzistenca e një populli. Asnjë individ, përfshirë sportistët që përfaqësojnë veten dhe komunitetin e tyre, nuk duhet dhe nuk mund të ndëshkohet për manifestimin e kësaj përkatësie. Flamuri nuk është thjesht një shenjë vizuale apo një element dekorativ; ai përfaqëson historinë, sakrificën dhe aspiratat kolektive të një kombi.
Përpjekjet për ta kufizuar apo për ta tjetërësuar këtë identitet përbëjnë jo vetëm cenim të lirisë së shprehjes, por edhe një akt politik të mohimit të qenies kombëtare. Ne nuk mund dhe nuk do të pranojmë asnjë formë presioni që synon ta relativizojë ose ta zbehë kuptimin e flamurit, sepse ai është thelbi i vetëdijes sonë historike dhe kombëtare.
Flamuri nuk është një zgjedhje, është një përkatësi që buron nga e kaluara jonë e përbashkët dhe që na obligon për ta mbrojtur me dinjitet e me vendosmëri. Dhe për sa kohë ekziston ky identitet, askush nuk do të mund ta tjetërsojë dot.
https://www.facebook.com/share/19mh4s1RHC/
