Muzikë, argëtim, kreativitet dhe shoqeri të reja në mes fëmijëve. Të gjitha këto u bënë bashk sot në sheshin e qytetit në Gostivar, ku u organizua një festë për fëmijët e qytetit nga shoqata humanitare “Dr.Trajçe Neshkovski” ,në prag të festës së ndërrimit të moteve.
” Ishte një mundësi që fëmijët të shoqërohen, të argëtohen dhe të gëzohen në pritje të Vitit të Ri në qytetin tonë. Gjithashtu organizuam treg humanitar ku shitëm punime artizanale, shumica prej tyre ishin nga stolitë e riparuara. Më herët, shoqata humanitare kishte bërë thirrje që qytetarët të dhurojnë dekorimet e vjetra që nuk i përdorin, në mënyrë që prej tyre të bëjmë dekorime të reja që do të kenë një shkëlqim të ri. Të njejtat janë ekspozuar dhe shitur, ndërsa mjetet do të përdoren për qëllime humanitare, planifikojmë për qendrën ditore për fëmijët me autizëm”, tha Ema Neshkovska nga shoqata.
Shoqata humanitare e qytetarëve “Dr.Trajçe Neshkovski” ditëve të fundit ka shpërndarë pako për Vitin e Ri në Qendrën Ditore për Persona me Aftësi të Kufizuara në Gostivar, Qendrën për personat me pengesa në të folur dhe degjim dhe në repartin e fëmijëve në spitalin e Gostivarit.
