Deputetja e BDI-së, Rina Ajdari ka reaguar pas dy ngjarjeve të djeshme dhe qasjes selektive, për të njëjtin fenomen nga organet e rendit dhe Qeveria.
Deputetja Ajdari ka theksuar se “nëse duam ta ndërtojmë të ardhmen bashkë duhet të respektojmë e vlerësojmë njëri tjetrin, simbolet kombëtare, gjuhën dhe kulturën e secilit, pra vullneti duhet të jetë i dyanshëm”.
Postimi i deputetes Ajdari në fb:
Të nderuar qytetarë, mbrëmë u dogj flamuri ynë kombëtar dhe u gris flamuri shtetëror. Deklaratat e sotme që vijnë nga Kryeministri i vendit, ministria e punëve të brendshme dhe nga partitë politike në pushtet, janë të njëanshme. Ky shtet është shtet i përbashkët, i të gjithëve pa përjashtim sepse atdhe rezervë nuk kemi ndërsa multietniciteti është vlerë e shtuar. Prandaj, kërkojmë nga organet e rendit të dy ngjarjet ti trajtojnë dhe tu qasen në mënyrë njejtë dhe joselektive. Nëse duam ta ndërtojmë të ardhmen bashkë duhet të respektojmë e vlerësojmë njëri tjetrin, simbolet kombëtare, gjuhën dhe kulturën e secilit, pra vullneti duhet të jetë i dyanshëm. Duke e poshtëruar e nënvlerësuar tjetrin e ndryshëm nga ne, nuk i ndihmojmë as procesit, as mirëqenies e as demokracisë.
