Deputeti Blerim Bexheti, ka reaguar ashpër ndaj deklaratave të fundit të Izet Mexhitit dhe Adnan Azizit, të cilët, sipas tij, kanë dalë në publik me qëndrime të koordinuara me liderin e opozitës maqedonase, Hristijan Mickoski, për çështjen e zjarreve në komunën e Kisella Vodës.
Në një postim të publikuar në rrjetet sociale, Bexheti i ka cilësuar Mexhitin dhe Azizin si “zëdhënës të vonuar” që ripërsërisin narrativat e opozitës maqedonase për të fajësuar BDI-në lidhur me zjarrvëniet e fundit.
“Ndoshta e kuptuan me vonesë se këto skenarë dhe manipulime të konsumuara, primitive e të tejkaluara nuk pinë më ujë – as te shqiptarët, e as te qytetarët që janë lodhur nga gënjeshtrat dhe lojërat politike,” shkruan Bexheti.
Deputeti i BDI-së thekson se bashkëpunimi i Mexhitit dhe Azizit me Mickoskin, në vend që të përfaqësojnë interesat shqiptare, është shenjë e nënshtrimit politik dhe shërbim i verbër ndaj axhendave të të tjerëve.
“Roli i ‘zëdhënësve të padronit’ në qeveri nuk është tjetër veçse dëshmi e nënshtrimit politik,” deklaron ai, duke shtuar se ky veprim do të motivojë shqiptarët që më 19 tetor, përmes votës së lirë, të japin përgjigjen e tyre.
“Vota shqiptare është e lirë, sovrane dhe nuk i shërben padronëve, por vetëm vetë shqiptarëve,” përfundon Bexheti.
Ky reagim vjen në një kohë të tensionuar politike, ku akuzat për destabilizim dhe përpjekjet për përfitime politike nga ngjarjet e fundit janë bërë pjesë e fushatës zgjedhore që po afrohet.
