Në lagjen Shaip Kamberi në Tetovë u mbajt takimi i radhës në kuadër të procesit të konsolidimit dhe riorganizimit të strukturave partiake të Bashkimi Demokratik për Integrim – Dega Tetovë.
Kryetari i BDI-së në Tetovë, Bajram Rexhepi, theksoi se ky proces po zhvillohet me përkushtim të plotë, seriozitet dhe vizion të qartë për të ardhmen, me qëllim forcimin e strukturave dhe afrimin edhe më të madh me qytetarët.
Në këtë takim, Ajetali Dervishi, aktivist i kahmotshëm i Bashkimit Demokratik për Integrim, u rizgjodh kryetar i nëndegës në Shaip Kamberi. Sipas Rexhepit, angazhimi dhe përvoja e tij shumëvjeçare janë garanci për stabilitet dhe veprim konkret në shërbim të komunitetit.
“BDI është familje e madhe politike dhe një thesar kombëtar për shqiptarët në vend. Riorganizimi që po e realizojmë hap dyert për çdo qytetar me ide, vizion dhe vullnet për kontribut,” u shpreh Rexhepi.
Procesi i ristrukturimit në Degën e Tetovës po vazhdon me takime të rregullta nëpër nëndegë, me synimin për të ndërtuar një BDI më të fortë, më të organizuar dhe më pranë qytetarëve.
