Nënkryetari i Bashkimit Demokratik për Integrim, Bajram Rexhepi, theksoi sot se rritja e kapaciteteve profesionale brenda partisë mbetet një nga prioritetet kryesore të saj. Deklarata e tij erdhi pas përfundimit të trajnimit të organizuar nga qendra analitike e BDI-së në bashkëpunim me National Democratic Institute – Macedonia, me temë “Strategjitë e komunikimit dhe aftësitë menaxhuese”.
Sipas Rexhepit, ky trajnim është një hap i rëndësishëm drejt përforcimit të profesionalizmit, efektivitetit organizativ dhe modernizimit të qasjes politike brenda strukturave të BDI-së.
“Investimi në aftësitë dhe njohuritë e kuadrove tona është investim në të ardhmen e partisë dhe të vendit. Këto programe trajnuese na ndihmojnë të ndërtojmë një administrim më efikas, komunikim më të qartë dhe lidership më të fortë,” deklaroi Rexhepi.
Ai shtoi se BDI do të vazhdojë me aktivitete të tilla zhvillimore, me synim krijimin e një infrastrukture të qëndrueshme profesionale që i përgjigjet sfidave të kohës.
