Kryetari i Bashkimit Demokratik për Integrim, Ali Ahmeti, me ftesë të Sh.T.Z. Gregor Presker, Ambasador i Republikës së Sllovenisë në Republikën e Maqedonisë së Veriut, mori pjesë në pritjen solemne të organizuar me rastin e Ditës Kombëtare të Republikës së Sllovenisë dhe Ditës së Forcave të Armatosura të Sllovenisë.
Gjatë kësaj ngjarjeje, Ahmeti riafirmoi rëndësinë e marrëdhënieve të shkëlqyera miqësore dhe bashkëpunimit ndërmjet Republikës së Maqedonisë së Veriut dhe Republikës së Sllovenisë, duke vlerësuar rolin dhe kontributin e vazhdueshëm të Sllovenisë në mbështetjen e proceseve demokratike, integrimit evropian dhe forcimit të stabilitetit në rajon.
Me këtë rast, Ahmeti përcolli urimet e tij më të sinqerta për popullin dhe institucionet e Republikës së Sllovenisë, duke u dëshiruar përparim, mirëqenie dhe suksese të mëtejshme.
Pritja solemne mblodhi përfaqësues të institucioneve shtetërore, trupit diplomatik, organizatave ndërkombëtare dhe personalitete të jetës publike, duke shërbyer si një mundësi për forcimin e lidhjeve miqësore dhe bashkëpunimit ndërmjet dy vendeve.
