Me rastin e 116-vjetorit të lindjes së Gonxhe Bojaxhiut – Nënë Terezës, Ali Ahmeti ka përkujtuar me nderim figurën e shquar shqiptare nga Shkupi, e cila u bë simbol botëror i humanizmit, dashurisë dhe paqes.
Ahmeti ka vlerësuar kontributin dhe përkushtimin e Nënë Terezës ndaj njerëzve në nevojë, duke theksuar se mesazhi i saj për solidaritet dhe humanizëm vazhdon të mbetet i rëndësishëm edhe sot.
“Nobelistja shqiptare i dhuroi njerëzimit një shembull të rrallë përkushtimi ndaj më të dobëtëve dhe atyre në nevojë, duke dëshmuar se mirësia dhe solidariteti nuk njohin kufij”, thuhet në mesazhin e Ahmetit.
Ai ka theksuar se emri dhe vepra e Nënë Terezës vazhdojnë të ndriçojnë në mbarë botën, ndërsa trashëgimia e saj mbetet një udhërrëfyes për ndërtimin e një shoqërie më humane dhe solidare.
Ja postimi plotë:
Sot, në 116 vjetorin e lindjes së Gonxhe Bojaxhiut – Nënë Terezës, kujtojmë me nderim bijën shqiptare të Shkupit, e cila u bë simbol botëror i humanizmit, dashurisë dhe paqes.
Nobelistja e parë shqiptare i dhuroi njerëzimit një shembull të rrallë përkushtimi ndaj më të dobëtëve dhe atyre në nevojë, duke dëshmuar se mirësia dhe solidariteti nuk njohin kufij.
Emri dhe vepra e Nënë Terezës vazhdojnë të ndriçojnë në mbarë botën. Trashëgimia e saj mbetet udhërrëfyes për të gjithë ne, për një shoqëri më humane dhe solidare.
