Bashkimi Demokratik për Integrim ka kërkuar mbajtjen e zgjedhjeve të parakohshme parlamentare, pas deklaratës së kryeministrit Hristijan Mickoski se është i gatshëm të shkojë në zgjedhje nëse këtë e kërkon opozita.
“E kërkojmë”, thuhet në reagimin e BDI-së, nga ku vlerësojnë se edhe kryeministri, sipas tyre, më në fund e ka kuptuar se gjendja në vend është e paqëndrueshme dhe se nevojitet një mandat i ri politik. Nga partia opozitare shqiptare akuzojnë Qeverinë se e ka humbur legjitimitetin për të vazhduar qeverisjen. Si arsye përmendin izolimin evropian të vendit, degradimin e marrëdhënieve ndëretnike, cenimin e Marrëveshjes Kornizë të Ohrit dhe dobësimin e përfaqësimit të shqiptarëve në institucione.
BDI kërkon që deklarata e kryeministrit të mos mbetet vetëm ofertë politike, por të shndërrohet menjëherë në hapa konkretë. Sipas partisë, brenda ditëve duhet të përcaktohet afati më i shpejtë kushtetues, të fillojnë përgatitjet zgjedhore dhe qytetarëve t’u mundësohet të vendosin për drejtimin e ardhshëm të vendit.
“Nëse oferta e kryeministrit është serioze, nuk ka arsye për vonesa, arsyetime apo kalkulime politike”, theksojnë nga BDI. Partia deklaron se opozita tashmë e ka dhënë përgjigjen dhe se është e gatshme për përballje zgjedhore. “Le të shpërndahet Kuvendi. Le të caktohet data. Le të shkojmë në zgjedhje”, përfundon njoftimi i BDI-së.
