Partia E Majta ka reaguar pas intervistës së ish-presidentit Stevo Pendarovski për emisionin “360 Shkallë”, duke vlerësuar se deklaratat e tij konfirmojnë pretendimet e kahershme të kësaj partie se VMRO-DPMNE ka marrë pjesë aktive në miratimin e ndryshimeve të kontestuara në Kodin Penal, përcjell gazeta KOHA.
Sipas partisë E Majta, Pendarovski zbuloi se ish-kryeministri Zoran Zaev e kishte informuar se ishte siguruar kuorumi për ndryshimet në nenin 353 të Kodit Penal dhe se, edhe në rast se presidenti do të vendoste veto, VMRO-DPMNE kishte garantuar se do të siguronte sërish kuorumin e nevojshëm për miratimin e tyre.
Nga E Majta thonë se ky është një konfirmim i drejtpërdrejtë i qëndrimit të tyre se LSDM-ja dhe VMRO-DPMNE-ja bashkëpunojnë kur bëhet fjalë për mbrojtjen e interesave të ish-funksionarëve të përfshirë në raste kriminale.
Partia opozitare vlerëson se me këto ndryshime janë shpëtuar nga ndjekja penale më shumë se 80 funksionarë të VMRO-DPMNE-së, ndërsa përmend edhe emra të njohur partiakë, si Igor Janushev dhe Antonio Milloshoski, të cilët, sipas tyre, përfituan nga ndryshimet ligjore.
E Majta gjithashtu akuzon qeverinë aktuale të udhëhequr nga Hristijan Mickoski se, në vend që të ashpërsojë politikën ndëshkuese për keqpërdorimin e detyrës zyrtare, ka vazhduar me ndryshime ligjore që, sipas tyre, kanë ulur dënimet dhe kanë dekriminalizuar një pjesë të veprave korruptive në procedurat e prokurimit publik.
Në reagim thuhet se mungesa e përgjegjësisë penale për ish-zyrtarët dhe mungesa e konfiskimit të pasurisë së përfituar në mënyrë të paligjshme dëshmon, sipas E Majta-s, për ekzistencën e marrëdhënieve të ndërsjella politike mes VMRO-DPMNE-së dhe LSDM-së për mbrojtjen e funksionarëve të tyre nga përgjegjësia ligjore. (koha.mk)
