Prefekti i Qarkut Tiranë, Shkëlqim Hajdari, ka marrë pjesë në një seri aktivitetesh të rëndësishme të zhvilluara në Malësi të Gjakovës dhe në zonën e Alpeve Shqiptare, duke përfshirë Konventën Euroballkanike të Alpeve të Ballkanit, eventin “Sofra Dardane” si dhe çeljen e sezonit turistik në Valbonë.
Në Konventën Euroballkanike të Alpeve të Ballkanit, u mblodhën personalitete të njohura të jetës publike, akademike dhe të sipërmarrjes, ku u diskutua mbi bashkëpunimin rajonal, zhvillimin e qëndrueshëm dhe potencialin e Alpeve si hapësirë strategjike për turizmin dhe ekonominë.
Gjatë aktivitetit kulturor “Sofra Dardane”, u vlerësua pjesëmarrja e grupeve artistike nga e gjithë Shqipëria, duke sjellë një promovim të pasur të trashëgimisë folklorike dhe identitetit kulturor shqiptar. Organizatorët theksuan rëndësinë e ruajtjes dhe promovimit të traditave në brezat e rinj.
Ndërkohë, në Valbonë u bë zyrtarisht çelja e sezonit turistik, një nga momentet më të rëndësishme për ekonominë lokale dhe për turizmin malor në veri të vendit. Zona e Alpeve Shqiptare vijon të mbetet një nga destinacionet më të vizituara për natyrën e paprekur dhe bukuritë e saj unike.
Pjesëmarrja e Prefektit Hajdari në këto aktivitete u vlerësua si një mbështetje për nismat që synojnë zhvillimin rajonal, promovimin e turizmit dhe forcimin e bashkëpunimit kulturor në hapësirën shqiptare dhe më gjerë.
