Projekti “The Guestkeepers – Miqtë e Vizitorëve”, i mbështetur nga Ministria e Kulturës, Rinisë dhe Sportit e Kosovës dhe i zbatuar nga ABSM, u prezantua me sukses në një fundjavë kulturore në Gjenevë, Bernë dhe Cyrih (27–29 mars 2026), duke zgjuar interes të madh tek diaspora shqiptare në Zvicër.
Qëllimi i projektit është të trajnojë të rinjtë si “ambasadorë të mikpritjes”, duke ndërthurur trashëgiminë kulturore me turizmin modern dhe duke vendosur standarde profesionale përmes platformës “Kosova INN”.
Në Gjenevë, aktiviteti u hap në Konsullatën e Kosovës, ku konsullja Floreta Kabashi vlerësoi iniciativën dhe rolin e diasporës në promovimin e vendit. Projekti u prezantua nga Krenare Rizvanolli-Sina dhe Nazmi Jakurti, duke marrë vlerësime dhe duke nxitur diskutime konkrete.
Në Bernë, gjatë një mbrëmjeje kulturore të frekuentuar, u theksua krijimi i një identiteti të ri të mikpritjes kosovare, i bazuar në profesionalizëm dhe përvoja autentike.
Pjesëmarrësit kontribuan me ide konkrete për zhvillimin e mëtejmë të projektit.
Ndërsa në Cyrih, në Konsullatën e Kosovës, konsulli Vigan Berisha nënvizoi rëndësinë strategjike të projektit për promovimin ndërkombëtar të Kosovës dhe përfshirjen e diasporës.
Ky projekt synon profesionalizimin e sektorit të turizmit, krijimin e standardeve të qëndrueshme dhe ndërtimin e një rrjeti bashkëpunimi, duke e shndërruar mikpritjen nga traditë në profesion.
Interesimi dhe angazhimi i diasporës shqiptare dëshmuan se ajo mbetet një faktor kyç në zhvillimin ekonomik dhe kulturor të Kosovës.
“The Guestkeepers” paraqet një hap konkret drejt promovimit ndërkombëtar të Kosovës, me vizionin që çdo vizitor të mos mbetet thjesht turist, por të bëhet mik.
