Zëvendëssekretari i Qeverisë, Hasim Murtezani, ka reaguar përmes një postimi publik, duke theksuar se bashkimi i koalicionit VLEN gëzon mbështetjen e shqiptarëve, ndërsa përpjekjet për përçarje, sipas tij, vijnë vetëm nga BDI-ja.
Murtezani shkruan se VLEN arriti ta dërgojë BDI-në në opozitë pas 22 vitesh në pushtet, gjë që, sipas tij, është arsyeja pse shqiptarët e duan VLEN-in të bashkuar. Ai shton se BDI-ja, e mbetur në opozitë, vazhdon të ushqejë shpresa për rikthim në pushtet duke synuar përçarjen e VLEN-it.
“Lidershipi i VLEN-it ka pjekuri politike dhe vigjilencë maksimale. Ëndrra për ta përçarë VLEN-in nuk do të realizohet”, thekson Murtezani në reagimin e tij.
Në fund, ai nënvizon se BDI-ja do të mbetet edhe më tej në opozitë, duke ritheksuar bindjen se koalicioni VLEN do të vazhdojë i bashkuar.
