Kryetari i Bashkimit Demokratik për Integrim, Ali Ahmeti, ka kujtuar ish-Sekretarin e Përgjithshëm të BDI-së, Abdilaqim Ademin, në ditën kur partia mbajti Kongresin e saj të Pestë, një ngjarje e rëndësishme për të ardhmen e subjektit politik.
Ahmeti theksoi se kjo datë përkoi me ditëlindjen e Abdilaqim Ademit, i cili, po të ishte gjallë, do të mbushte 56 vjet, duke e cilësuar atë si një nga figurat me kontribut të jashtëzakonshëm në konsolidimin dhe forcimin e BDI-së.
“Jeta dhe veprimtaria e Abdilaqim Ademit ishin të mbushura me angazhim, përkushtim dhe besnikëri të palëkundur ndaj idealeve të përbashkëta dhe ndaj Bashkimit Demokratik për Integrim,” u shpreh Ahmeti.
Sipas tij, BDI, edhe pse përballet me sfida dhe sulme nga të gjitha anët, vazhdon të mbetet një forcë e pathyeshme politike, duke ecur përpara me përgjegjësi historike dhe vizion të qartë për të ardhmen e shqiptarëve në Maqedoninë e Veriut.
Ahmeti nënvizoi se kujtimi për Abdilaqim Ademin mbetet i lidhur ngushtë me sukseset historike të BDI-së dhe me rrugëtimin e shqiptarëve drejt dinjitetit, barazisë dhe perspektivës evropiane.
“Nuk harrohet nga shokët, miqtë dhe bashkëveprimtarët e tij. Nuk harrohet as nga unë,” përfundoi Ahmeti.