Më 28 Nëntor, në Ditën e Flamurit, në Garanë të Kerçovës do të inaugurohet zyrtarisht shtatorja e Kryeheroit Kombëtar të shqiptarëve, Gjergj Kastrioti Skënderbeu. Ceremonia pritet të jetë një ndër ngjarjet më domethënëse për komunitetin shqiptar në rajon, duke u zhvilluar në një datë me simbolikë të thellë historike.
Organizatorët kanë bërë të ditur se në këtë ditë të shënuar do të marrin pjesë qytetarë, veprimtarë dhe mysafirë nga trevat shqiptare, të cilët do të bashkohen për të nderuar figurën dhe trashëgiminë e Skënderbeut.
Nisma është realizuar nga Shoqata Humanitare “Garana”, e udhëhequr nga Faik Elezi, e cila ka marrë vlerësime të veçanta për angazhimin dhe përkushtimin në finalizimin e këtij projekti madhështor. Mirënjohje u është shprehur edhe gjithë kontribuuesve që kanë mbështetur përmendoren.
Inaugurimi pritet të zhvillohet në një atmosferë festive dhe me rëndësi të veçantë simbolike, teksa shqiptarët anë e mbanë shënojnë 28 Nëntorin, Ditën e Pavarësisë dhe Ditën e Flamurit.
