Sot, më 19 nëntor (e mërkurë), me ftesë të Kryetarit të Odës Ekonomike të Maqedonisë Veriperëndimore (OEMVP), z. Nuhi Aliu, Kryetari i Bashkësisë Fetare Islame të RMV-së, Reisul Ulema H. Hfz. Shaqir ef. Fetai, i shoqëruar nga Myftiu i Myftinisë së Shkupit, Dr. Qenan ef. Ismaili, drejtori i Agjencisë për Hallall Standard, z. Driton Dikena, si dhe drejtori i sektorit fetaro-arsimor, Mr. Fejzulla ef. Sadiki, mori pjesë në eventin vjetor “TOP 100”.
Në këtë manifestim, ku morën pjesë personalitetet më të larta shtetërore – përfshirë Kryeministrin e vendit, z. Hristijan Mickoski, Kryetarin e Kuvendit, z. Afrim Gashi, si edhe zyrtarë të tjerë të nivelit qendror e lokal, biznesmenë dhe afaristë nga vendi dhe rajoni – u bë ndarja e çmimeve për kompanitë më të suksesshme të vitit. Po ashtu, u promovua katalogu i 100 kompanive më konkurruese, në të cilin u përfshi edhe Agjencia për Hallall Standard, që funksionon në kuadër të BFI-së.
Ky vlerësim i rëndësishëm për Agjencinë për Hallall Standard është dëshmi e përkushtimit të saj ndaj cilësisë, zbatimit të standardeve më të larta dhe angazhimit për të sjellë vlera të qëndrueshme dhe të besueshme në tregun e Maqedonisë së Veriut dhe më gjerë.
