Kryetari i Bashkimit Demokratik për Integrim, Ali Ahmeti, ka përkujtuar sot 36-vjetorin e rënies heroike të Afrim Zhitisë dhe Fahri Fazliut, dy prej figurave më të ndritura të historisë kombëtare shqiptare.
“Sot e 36 vjet më parë, më 2 nëntor 1989, në Breg të Diellit në Prishtinë, në përballje direkte me forcat policore-ushtarake të ish-Jugosllavisë, ranë heroikisht heronjtë e kombit Afrim Zhitia dhe Fahri Fazliu. Rënia e tyre heroike ishte paralajmërimi i përfundimtar se dalja nga zgjedha pushtuese serbe mund të bëhej vetëm me luftë të armatosur çlirimtare,” – theksoi Ahmeti.
Ai shtoi se Afrimi dhe Fahriu, pas rënies së Jusuf e Bardhosh Gërvallës, Kadri Zekës, Rexhep Malajt dhe Nuhi Berishës, u bënë pararendësit e Ushtrisë Çlirimtare të Kosovës, duke i dhënë drejtim e frymë qëndresës së armatosur për liri.
“Lavdi e përjetshme heronjve të kombit Afrim Zhitisë dhe Fahri Fazliut. Sakrifica e tyre është frymëzim për brezat që ta ruajnë lirinë dhe ta ndërtojnë të ardhmen mbi themelet e sakrificës,” – përfundoi Ali Ahmeti.
