Bashkimi Demokratik për Integrim shpreh shqetësim të thellë për katastrofën ekologjike që ka përfshirë kryeqytetin pas zjarrit në lagjen Trubarevë, ndërkohë që zëdhënësi i Mickoskit, Izet Mexhiti, në vend që të merret me detyrën e tij dhe mbrojtjen e shëndetit publik, shfaqet nëpër aktivitete partiake dhe bën fushatë elektorale.
Është paradoksale që pikërisht Ministria e Mjedisit, e drejtuar nga Mexhiti, është ajo që jep leje për funksionimin e objekteve të këtilla dhe ka për obligim t’i kontrollojë ato. Dje, kur Shkupi u mbulua nga re toksike, Izeti i mbyll sytë para përgjegjësisë së vet dhe, si gjithmonë, mundohet të gjejë fajtorë kujdestarë në BDI.
Kjo është e njëjta sjellje që Mexhiti e ka treguar edhe më herët: për kaosin urban që e shkaktoi në Çair mbi dy dekada, për “bombën ekologjike” në Shkup dhe për çdo dështim tjetër, gjithmonë mundohet t’ia faturojë fajin të tjerëve.
E pyesim publikisht edhe një herë z. Mexhiti: kush i ka ndezur zjarret në Manastir, Kavadarci, në Shtip dhe në qytete tjera të Maqedonisë Lindore e Jugore? A vallë edhe aty fajin e ka BDI-ja?
