Këshilli i Marrëdhënieve Shqiptaro-Amerikane (AARC) shpreh shqetësimin më të thellë lidhur me pezullimin e Dialogut Strategjik ndërmjet Shteteve të Bashkuara të Amerikës dhe Kosovës. Ky zhvillim duhet të shërbejë si një thirrje urgjente për veprim nga ana e udhëheqësve dhe institucioneve të Kosovës.
Prej një kohe të gjatë, AARC ka paralajmëruar për një erozion të marrëdhënieve mes Kosovës dhe SHBA-së. Marrëdhëniet diplomatike kanë arritur një pikë të ulët historike, dhe pezullimi i Dialogut Strategjik është shembulli më i fundit dhe më alarmues i këtij përkeqësimi. Kjo prirje duhet ndalur menjëherë. Rindërtimi i besimit dhe i partneritetit kërkon koordinim të ngushtë me Shtetet e Bashkuara në çdo nivel.
Së pari dhe mbi të gjitha, duhet të respektohet Kushtetuta dhe rendi kushtetues i Kosovës. Udhëheqësit politikë duhet të veprojnë pa vonesë për të funksionalizuar institucionet në përputhje me rezultatet e zgjedhjeve më të fundit, ose të arrijnë një konsensus të shpejtë që do të hapte rrugën për zgjedhje të reja. Pezullimi i Dialogut Strategjik nuk duhet të shfrytëzohet nga asnjë forcë politike për përfitime afatshkurtra, pasi qeveritë ndryshojnë, por koston përfundimtare e paguan Kosova dhe qytetarët e saj.
Mungesa e vullnetit dhe aftësisë për të hyrë në dialog ka krijuar një polarizim ekstrem në vend. Edhe çështje që janë të qarta dhe të përcaktuara në Kushtetutë janë shndërruar në debate të panevojshme juridike dhe kushtetuese. Patriotizmi dhe dashuria për Kosovën nuk i përkasin një individi apo partie të vetme. Përkundrazi, si qeveritë – qofshin ato teknike apo të plotfuqishme – ashtu edhe partitë politike kanë detyrimin të udhëheqin me përgjegjësi dhe të krijojnë një ambient të përshtatshëm për dialog politik. Çështjet që lidhen me sovranitetin, obligimet ndërkombëtare, pavarësinë dhe interesat jetike të shtetit i përkasin të gjithë qytetarëve të Kosovës, jo vetëm një partie apo një qeverie.
Fryma pro-amerikane e popullit të Kosovës nuk duhet kurrsesi të manipulohet apo keqpërdoret. Është e njohur se askush nuk është më pro-amerikan se qytetarët e Kosovës. Në këtë drejtim, Presidentja e Republikës duhet të veprojë me guxim dhe pa vonesë, duke përdorur autoritetin e saj kushtetues – përfshirë mundësinë për të udhëhequr vendin drejt zgjedhjeve të reja, nëse është e nevojshme. Ajo gjithashtu duhet të angazhohet drejtpërdrejt me Ambasadën e SHBA në Prishtinë dhe me autoritetet në Uashington, për të kuptuar arsyet reale të pezullimit të Dialogut Strategjik dhe për të komunikuar në mënyrë transparente me opinionin publik.
Në të njëjtën kohë, duhet theksuar padrejtësia e thellë e kësaj situate: ndërkohë që Kosova qortohet ashpër, Serbia – udhëheqja e së cilës është hapur e lidhur me Rusinë dhe Kinën dhe që sponsorizon destabilizim rajonal, përfshirë inkursionet paramilitare në Kosovë – shpërblehet me vizita të nivelit të lartë nga Sekretari i Shtetit amerikan dhe me diskutime për partneritet strategjik. Megjithatë, kjo realitet nuk e përjashton Kosovën nga përgjegjësitë e saj. Siç thotë një proverbë ballkanike: “Vrasja e lopës së fqinjit nuk të sjell më shumë qumësht.” Kosova duhet të shikojë drejt vetes, të ndërmarrë veprime korrigjuese dhe të dëshmojë pjekurinë e institucioneve dhe të udhëheqjes politike.
Veprimet për të ushtruar sovranitet janë të drejta në parim, por në praktikë, nuk ka sovranitet të qëndrueshëm për Kosovën pa mbështetjen e Shteteve të Bashkuara. Në çdo hap që ndërmerret, Kosova duhet të marrë parasysh me kujdes interesat e aleatëve të saj – para së gjithash ato të SHBA-së.
Për më tepër, si qeveria aktuale, ashtu edhe çdo qeveri e ardhshme, duhet të krijojnë urgjentisht mekanizma dhe kanale lobimi në Uashington, D.C. Kjo punë nuk mund të vonohet. Kosova nuk duhet të lejohet të ndëshkohet në favor të Serbisë – sidomos në një kohë kur Serbia drejtohet nga një ish-ministër i regjimit të Millosheviqit, i cili ka bërë të qartë se synimi i tij kryesor është afrim i mëtejshëm me Rusinë dhe Kinën.
Këshilli i Marrëdhënieve Shqiptaro-Amerikane u bën thirrje institucioneve dhe udhëheqjes politike të Kosovës që të përgjigjen me unitet dhe përgjegjësi ndaj këtij momenti krize, të veprojnë me mençuri dhe vizion, dhe të sigurojnë që partneriteti i Kosovës me Shtetet e Bashkuara të mbetet i fortë, efektiv dhe i orientuar drejt së ardhmes.